كەشە استاناداعى «عاشىقتار» ساياباعىندا سالماعى 736,5 كيلو تارتاتىن اس, ياعني ۇلتتىق تاعامىمىز دايىندالىپ, حالىققا ۇسىنىلدى. بۇل ەرەكشە شارانى ۇيىمداستىرۋشىلار سول ساتتە گيننەستىڭ رەكوردتار كىتابىنىڭ سەرتيفيكاتىن يەلەندى.
تاراتا ايتار بولساق, «تايقازان» دەپ ايدار تاعىلعان بۇل اكتسيانى قازاقستان حالقى اسسامبلەياسى, قازاق گەوگرافيالىق قاۋىمداستىعى مەن استانا قالاسى اكىمدىگى ۇيىمداستىردى. اكتسيا قازاقستان حالقى اسسامبلەياسىنىڭ 20 جىلدىعىنا جانە استانا كۇنىنە تارتۋ رەتىندە قولعا الىندى.
اكتسياعا قازاقستان حالقى اسسامبلەياسى توراعاسىنىڭ ورىنباسارى – حاتشىلىق مەڭگەرۋشىسى ەرالى توعجانوۆ, ءماجىلىس دەپۋتاتتارى, قوعام
قايراتكەرلەرى, قحا-نىڭ, قازاق گەوگرافيالىق قوعامى قاۋىمداستىعىنىڭ, ەلىمىزدىڭ باس اسپازدار قاۋىمداستىعى مەن ەتنومادەني بىرلەستىكتەردىڭ ءمۇشەلەرى, گيننەستىڭ رەكوردتار كىتابىنىڭ قىزمەتكەرلەرى, جاستار ۇيىمدارىنىڭ جەتەكشىلەرى, باق, زيالى قاۋىم وكىلدەرى, قالا تۇرعىندارى قاتىستى.
وسىناۋ ەرەكشە شارانى ۇيىمداستىرۋشىلاردىڭ سوزىنە قاراعاندا, قازاقتىڭ ءوزى «ەت» دەپ اتايتىن ۇلتتىق تاعامىمىزدى 40 اسپاز تاڭعى ساعات 4.00-دەن باستاپ دالادا, قازاق حالقىنىڭ ەت اسۋداعى ءداستۇرلى رەتسەپتىمەن دايىندادى.
استانا
جولدىباي بازار,
«ەگەمەن قازاقستان».
ونى ازىرلەۋگە شامامەن 700 كيلودان استام جىلقى ەتى, 300 كيلوعا جۋىق جۇمىرتقا مەن پياز, 300 كيلوداي ۇن پايدالانىلعان. ءداستۇر بويىنشا ەتتىڭ قامىرى قولمەن جايىلدى. ءناتيجەسىندە 736,5 كيلو تاماق ازىرلەنىپ, قالا تۇرعىندارى مەن قوناقتارىنا ۇسىنىلدى. ونى دايىنداۋعا قاتىسقاندار قۇرامىندا قالاداعى ءىرى مەيرامحانالاردا اسپازدىق قىزمەت كورسەتەتىن بىلىكتى ماماندار بولدى. سونداي-اق, شارا كەزىندە 20-دان استام داياشى جۇرتشىلىققا ءىلتيپات كورسەتە قىزمەت ەتتى.
اكتسيا بارىسىندا وسىنشا مول ازىرلەنگەن استى گيننەستىڭ رەكوردتار كىتابىنا ەنگىزۋ ءراسىمى سالتاناتتى جاعدايدا ءوتتى. قازاقتىڭ بەلگىلى ازاماتى مىرزاتاي جولداسبەكوۆ ەلگە باتا بەرسە, ايتۋلى اقىن نەسىپبەك ايت ۇلى كوڭىل تەربەتەر ولەڭ وقىدى. ال ءوز كەزەگىندە ەرالى توعجانوۆ جۇرتشىلىقتى استانا كۇنىمەن قۇتتىقتاي وتىرىپ, ۇلتىمىزدىڭ قوناقجايلىلىعى, قاسيەتتى تايقازاننىڭ قادىرى, ونىڭ ءومىرىمىزدەگى ورنى, الاساپىران زامانداردا ەلىمىزگە كەلگەن وزگە ۇلت وكىلدەرىنە قازاق حالقىنىڭ كورسەتكەن قامقورلىعى جونىندە اڭگىمەلەپ بەردى.
بۇدان كەيىن گيننەستىڭ رەكوردتار كىتابى شتاب-پاتەرىنىڭ سۋپەرۆايزەرى, ياعني لوندوننان كەلگەن وكىل شەيدا شۋباسي گەميدجي ءسوز الدى. ول: «مەن استاناعا ارنايى كەلىپ, قازاقتىڭ ۇلتتىق تاعامىن كورىپ, ونىڭ ەڭ ۇلكەن كولەمدە دايىندالعانىنا كۋا بولدىم. بۇگىنگى شارا بارىسىندا اس ازىرلەۋدىڭ بارلىق تالاپتارى ورىندالدى. سوندىقتان مەن قازاقستاندىقتاردى وسى جەڭىسپەن قۇتتىقتايمىن, – دەدى.
وسىلايشا, «ەلدىڭ باستى ۇلتتىق تاعامىن ازىرلەۋ» دەگەن ايدارمەن اتالعان رەكورد رەسمي تۇردە تىركەۋگە الىندى.
شارانى ۇيىمداستىرۋشىلاردىڭ ءبىرى, قازاق گەوگرافيالىق قوعامى ءتورالقاسىنىڭ مۇشەسى تولەگەن تاستانبەكوۆ قۋانىشتى ساتتە: «تولقىپ تۇرمىن. ۇلتتىق تاعامىمىز گيننەستىڭ رەكوردتار كىتابىنا ەندى. 736,5 كيلو اس دايىنداپ, بۇگىن ونى حالىققا ۇسىنىپ وتىرمىز. ەڭ باستىسى – اكتسيانى ەل-جۇرتىمىز جىلى قابىلدادى», – دەپ اعىنان جارىلدى.
جالپى, الەم بويىنشا ەڭ كوپ مولشەردەگى ۇلتتىق تاعامدى ازىرلەۋگە ارنالعان «تايقازان» اكتسياسى «قحا – 20 يگى ءىس» ەستافەتاسىنىڭ جالعاسى بولىپ تابىلادى. جيىنعا قاتىسۋشىلار تاراپىنان تايقازان جونىندە جىلى لەبىزدەر ايتىلدى. كوپشىلىك تايقازاندى حالقىمىزدىڭ بىرلەسۋى مەن قوناقجايلىلىعىنىڭ سيمۆولى دەپ ەسەپتەيتىندەرىن جەتكىزۋمەن بولدى. اكتسيا قازاقستاندىقتاردىڭ ءوزارا تاتۋلىقتا, بارشىلىق پەن توقشىلىقتا مامىراجاي تىرلىك ەتىپ جاتقانىن سيپاتتاعان ەرەكشە شارا رەتىندە جۇرتشىلىقتىڭ ەسىندە ساقتالىپ قالاتىنىنا سەنەمىز.
تاعى ءبىر ايتا كەتەر جايت, اكتسيا اياسىندا شىعارماشىلىق ۇجىمدار مەن قازاق اندەرىن ورىنداۋشىلارىنىڭ قاتىسۋىمەن مەرەكەلىك كونتسەرت, ۇلتتىق تاعامدى دايىنداۋ بويىنشا شەبەرلىك ساباقتار جانە قازاق گەوگرافيالىق قوعامىنىڭ ءمۇشەلەرىمەن كەزدەسۋ ۇيىمداستىرىلدى.
اقتاۋ
گۇلايىم شىنتەمىرقىزى,
«ەگەمەن قازاقستان».
ماڭعىستاۋ وبلىسىندا استانا كۇنى مەرەكەسى كەڭ كولەمدە تويلانۋدا. وبلىستىڭ بارلىق اۋدان-قالالارىندا سپورتتىق جانە مادەني شارالار وتكىزىلىپ, جاستار اراسىندا ونەر سايىستارى وتكىزىلدى.
وبلىس ورتالىعى اقتاۋ قالاسىندا ەلوردانىڭ 17 جىلدىعى قارساڭىندا ءبىر توپ كامەلەتتىك جاسقا تولعان ءجىگىتتەر مەن قىزدارعا جەكە باستارىن كۋالاندىراتىن تولقۇجات تابىستالدى. سالتاناتتى ساتكە لوندون وليمپياداسىنىڭ كۇمىس جۇلدەگەرى ءا.نيازىمبەتوۆ قاتىسىپ, جاستاردى قۇتتىقتاپ, ولارعا ەستەلىك سىيلىقتار تابىس ەتتى.
شىلدەنىڭ 4-ىنەن باستاپ تەڭىز جاعالاۋىندا كلاسسيكالىق, ەسترادالىق جانە روك مۋزىكا وكىلدەرىنىڭ مەرەكەلىك كونتسەرتتەرى ۇيىمداستىرىلىپ, تەڭىز جاعاسىندا سەرۋەندەگەن قالا تۇرعىندارى مەن قوناقتارىنىڭ نازارىنا ۇسىنىلدى. سونداي-اق, جاستار اراسىندا «استانا – ارمان قالا» اتتى پلەنەر سۋرەتشىلەر بايقاۋى وتسە, ت.شەۆچەنكو ەسكەرتكىشى جانىندا ۋكراين ەتنومادەني بىرلەستىگى وكىلدەرى شىعارماشىلىق توپتارى ونەر كورسەتتى. اقتاۋ قالالىق اكىمدىگىنىڭ ۇيىمداستىرۋىمەن اسىق اتۋدان, قول كۇرەسىنەن, ارقان تارتىستان جانە گىر تاسىن كوتەرۋدەن, «Street Workout» سپورت تۇرىنەن قالالىق تۋرنير ۇيىمداستىرىلىپ, وعان قىزىعۋشىلىق تانىتقان اقتاۋ قالاسىنىڭ تۇرعىندارى مەن قوناقتارىنىڭ قاتىسىپ, ءوزارا كۇش پەن ەپتىلىك سىناۋ مۇمكىندىگى قامتاماسىز ەتىلدى. ەلوردانىڭ جاڭا جاسىنا ارنالعان ادەمى دە اسەرلى شارالار ءوڭىردىڭ بارلىق اۋداندارى مەن قالالارىندا جالعاسىن تاپتى.
اقتوبە
ساتىبالدى ءساۋىرباي,
«ەگەمەن قازاقستان».
كەشەگى كۇن رايى وبلىس ورتالىعىنداعى استانا كۇنىنە ارنالعان مەرەكەلىك شارالاردىڭ بەتاشارى رەتىندە ۇيىمداستىرىلعان ۆەلوجارىسقا قاتىسۋشىلارعا قولايلى بولدى. ويتكەنى, كۇن ىسىپ ۇلگەرمەگەن كەز ەدى. مۇنىڭ ءوزى «اقتوبە قالاسىنىڭ دەنە تاربيەسى جانە سپورت ءبولىمى مم-ءنىڭ ۇستىمىزدەگى جىلى ۇيىمداستىرىپ وتىرعان ەكىنشى اۋقىمدى جارىسى. بۇعان دەيىن كوكتەمدە جەلاياقتار جارىس جولىنا شىققان بولاتىن. بۇل جولى دا جەڭىمپازدار باعالى سىيلىقتارمەن جانە ديپلومدارمەن ماراپاتتالدى.
ۆەلوجارىسقا قاتىسقان «FORWARD» كومانداسىنىڭ ۆەلوشاباندوزدارىن وسى اتتاس كومپانيانىڭ ديلەرى ۆەنەرا ەرەجەپوۆا باستاپ كەلىپتى.
– ءبىز وسى ۆەلوجارىس جەڭىمپازدارىن ماراپاتتاۋعا ءتورت ۆەلوسيپەد بولدىك. بۇل ءبىر جاعىنان استانا كۇنىنە ارنالعان شاراعا قولداۋىمىز, بۇقارالىق سپورتتى دامىتۋعا قوسقان ۇلەسىمىز بولسا, ەكىنشى جاعىنان, ءوز ءونىمىمىزدى جارنامالاۋ دا ەكەنىن جاسىرۋدىڭ رەتى جوق, – دەيدى ۆ.ەرەجەپوۆا,
«مەگا-اقتوبە» ويىن-ساۋىق كەشەنى الدىنداعى الاڭدا ۆەلوجارىس جەڭىمپازدارىن ماراپاتتاۋ سالتاناتىنان كەيىن اننەن شاشۋ شاشىلىپ, كۇي كۇمبىرلەدى, بي بيلەندى.
ۇيىمداستىرۋشىلار ءوڭىردى اپتاپ ىستىق بۋىپ تۇرعانىن ەسكەرگەن بولۋى كەرەك, مەرەكەلىك شارانىڭ نەگىزگىلەرىن كۇننىڭ ىستىعى قايتقان تۇستەن كەيىنگى كەزەڭگە قويىپتى. استانا كۇنى قازاقستان رەسپۋبليكاسىنىڭ تۇڭعىش پرەزيدەنتى نۇرسۇلتان نازارباەۆ اتىنداعى ورتالىق دەمالىس ساياباعىندا وبلىستاعى ەتنومادەني بىرلەستىكتەردىڭ كوركەمونەرپازدار ۇيىمدارى مەن ءوڭىردىڭ تالانتتى ونەرپازدارى كونتسەرتتىك باعدارلاما ۇسىندى. قالالىقتار ءان مەن كۇي تىڭداپ, ءبيدى تاماشالادى.
مۇنداي مادەني-كوپشىلىك شارالار قالانىڭ ساياباقتارى مەن الاڭدارىندا قاس قارايعانشا جالعاستى. بۇل كۇنى قالالىقتار مەن شاھار قوناقتارى تۇگەل كوشەگە شىعىپ كەتكەندەي اسەرگە بولەدى. وبلىس ورتالىعىنداعى استانا كۇنىنە ارنالعان ءتۇرلى-ءتۇستى وتشاشۋ قالا اسپانىن بۇرىنعىدان دا اجارلاندىرىپ جىبەرگەندەي بولدى. ەلىمىزدىڭ باس قالاسىنا قاراپ بوي تۇزەگەن اقتوبە ايتۋلى مەرەكەنى وسىلاي اتاپ ءوتتى.
اتىراۋ
جولداسبەك شوپەعۇل,
«ەگەمەن قازاقستان».
مۇنايلى وڭىردە ەلىمىزدىڭ جاڭا ەلورداسى – استانا كۇنىنە ارنالعان مەرەكەلىك شارالار شوعىرى اۋقىمدىلىعىمەن ەرەكشەلەندى. ولاي دەيتىنىمىز, مەرەكە قارساڭىندا وندىرىستە دە, الەۋمەتتىك سالادا دا كوڭىل جادىراتار قۋانىشتى ساتتەر از بولمادى. ماسەلەن, اتىراۋ مۇناي وڭدەۋ زاۋىتىندا بەنزولدىڭ العاشقى پارتياسى الىندى. بۇل – بۇعان دەيىن ەلىمىزدە شىعارىلماعان جاڭا ءونىم. زاۋىتتىڭ باس ديرەكتورى قايرات ورازباەۆ: «جوعارى وكتاندى بەنزين شىعارۋ ءۇشىن ونىڭ قۇرامىنداعى بەنزول ءونىم رەتىندە بولەك الىندى. بۇل – ءبىزدىڭ ەڭ اسەم ەلوردامىز – استانا كۇنىنە تارتۋىمىز», – دەدى جاڭا ءونىمنىڭ شىعارىلۋىنا وراي وتكەن سالتاناتتى شارادا.
اتىراۋ قالاسىندا «وڭىرلەردى دامىتۋدىڭ 2020 جىلعا دەيىنگى باعدارلاماسى» اياسىندا بوي كوتەرگەن بىرنەشە كوپ قاباتتى تۇرعىن ءۇي پايدالانۋعا بەرىلىپ, 126 وتباسى باسپانالى بولۋ باقىتىنا كەنەلدى. ولاردىڭ اراسىندا بىرنەشە جىلدان بەرى پاتەر جالداپ جۇرگەندەر دە بار ەكەن. سونىمەن بىرگە, العاش رەت «اتىراۋدىڭ قۋاتتى ادامدارى» اتتى ەكسترەمالدى سپورت تۇرلەرىنەن وتكەن وبلىستىق تۋرنير دە تۇرعىنداردى ەرەكشە اسەرگە بولەدى. تۋرنيرگە قاتىسۋشىلار سالاماتتى ءومىر سالتىن ۇستانۋدىڭ دەنساۋلىققا پايدالى ەكەنىن پاش ەتتى. سولاردىڭ اراسىنان ۆلاديمير لي سالماعى ءۇش تونناعا جۋىق «گازەل» شاعىن اۆتوبۋسىن 20 مەترگە سۇيرەدى. وعان وسىنشا ارالىققا جەتۋ ءۇشىن 16,3 سەكۋند عانا قاجەت بولدى.
مەرەكەلىك شارالار اتىراۋ قالاسى مەن اۋدان ورتالىقتارىندا, ءار وكرۋگتە ءوتتى. ماسەلەن, ءوڭىر ورتالىعىندا «جەڭىس» ساياباعىنان شەرۋ تارتقان ۆەلوشەرۋشىلەر قۇرمانعازى, ۆلاديميرسكي, ساتباەۆ كوشەلەرى ارقىلى «يساتاي-ماحامبەت» الاڭىنا دەيىنگى ارالىقتى ءجۇرىپ ءوتتى. سونداي-اق, «ەلىمنىڭ جۇرەگى – استانا!» جانە «جىرلايمىن سەنى, استانا!» اتتى كونتسەرتتىك باعدارلامالار ءوڭىر تۇرعىندارىنا مەرەكەلىك كوڭىل-كۇي سىيلادى. كونتسەرتتىك باعدارلامالار سوڭىنا قاراي اتىراۋدىڭ اسپانىن مەرەكەلىك وتشاشۋ ارلەندىردى.
راحىم قويلىباەۆ.
كوكشەتاۋ
باقبەرگەن امالبەك,
«ەگەمەن قازاقستان».
جاقسىلىق جەتەگىندەگى حالقىمىزدىڭ بيىك قۇرمەتى – «جۇلدىزىڭ جوعارى بولسىنعا» سايادى. اسەم استانامىزدىڭ از جىلداردىڭ ىشىندە الەم كەڭىستىگىندەگى ايشىقتى جۇلدىزعا اينالۋى وسىناۋ اق تىلەكتىڭ ورىندالعانىنىڭ ايعاعى. ەل تاريحىنداعى جاڭا دا جارقىن مەرەكە قازاقستان شەڭبەرىنەن اسىپ, جەر شارىن شارلاپ بارا جاتقانى دا بولاشاعىمىزدىڭ جارقىندىعىن بەينەلەيتىندىگى قۋانتادى.
بيىلعى مەرەكەلەر جىلىن استانالىق اقمولا وبلىسى قوعام ءومىرىنىڭ تۇتاس بۋىنىندا ەرەكشە سەرپىلىسپەن اتاپ وتۋدە. باسقاسىن ايتپاعاننىڭ وزىندە, ءوڭىر جۇرتشىلىعى «استانا كۇنىن» ون كۇن بۇرىن رەسمي تۇردە باستاپ كەتتى. شاتتىق پەن شاشۋدىڭ مازمۇنى كەڭىپ, تارتۋ جورالعىسى ءتانتى ەتۋدە. تۇرعىن ۇيلەر, ەكونوميكالىق جانە الەۋمەتتىك تۇرعىداعى نىسانداردىڭ پايدالانۋعا بەرىلۋى تىرشىلىگىمىزدى تۇرلەندىرە ءتۇستى. اقمولالىقتار مۇنى استانا شاراپاتىمەن بايلانىستىرادى.
كوكشەتاۋعا ەكى تاۋلىك بويى ىرىزدىق قۇيعان كۇن جارىقتىق شايداي اشىلدى. تاۋەلسىزدىك الاڭى بار جاساۋىن جارقىراتىپ, جادىراڭقى كوڭىلدەردى اسپانداتىپ تۇر. بالالار ءوز قيالىن اسفالتقا ءتۇسىرىپ جاتسا, ارنايى ساپارمەن استانانى ارالاپ كەلگەن قاريالار العان اسەرلەرىن جەتكىزە الماي ءماز. انۇرانىمىزبەن باستالعان سالتاناتقا قاتىسۋشىلاردى قالا اكىمى ەرمەك مارجىقپاەۆ قۇتتىقتادى.
استانا كۇنى ايشىقتى شارالارىمەن ەستە قالاتىن ءداستۇر قالىپتاسقالى قاشان. انە, جاڭا عانا ىڭگالاپ دۇنيەگە كەلگەن سابيلەرگە باۋى بەرىك بولسىن ايتقان دەپۋتاتتار تورسورەدەن ورىن الۋدا. قالا باسشىسىنىڭ قولىنان استانا قۇرداستارى, 10 سىنىپ وقۋشىلارى الماس ۇسەنوۆ, جازيرا السەيىتوۆا, اڭسات دولداش, اننا گولۋبكوۆا رەسپۋبليكا ازاماتىنىڭ جەكە كۋالىگىن السا, 10 ادامعا «نۇر وتان» پارتياسىنىڭ بيلەتى تاپسىرىلدى. ولاردىڭ اراسىندا زەينەتكەر كارىم بوستانباەۆ تا بار.
ال ارداگەرلەر كەڭەسى توراعاسىنىڭ ورىنباسارى ۆالەنتينا سولومينا مەن №14 مەكتەپتىڭ اعا ۆوجاتىيى ليۋدميلا داۋلەتاليەۆانىڭ ومىراۋىنا «قازاقستان حالقى اسسامبلەياسىنا – 20 جىل» مەرەكەلىك مەدالى تاعىلدى.
كوكشەتاۋدىڭ ورتالىق الاڭدارى مەن شاعىن اۋداندارىنداعى مادەني-سپورتتىق شارالار مەن كوپشىلىك دۋمانى مەرەكەلىك وتشاشۋمەن جالعاستى.
قاراعاندى
ايقىن نەسىپباي,
«ەگەمەن قازاقستان».
«كورشى دە كورشىدەن ءتالىم الادى» دەيدى ەمەس پە, ءوسىپ-وركەندەۋى ءارى ەلوردا, ءارى ىرگەلەس كورشى تۇرعىسىندا ۇلكەن ۇلگى قالا مەرەكەسى قاراعاندىلىقتارعا دا ءاردايىم زور قۋانىش. بۇل مەرەيلى كۇنگە ارنالعان شارالار ءبىر كۇن بۇرىن «ساعان, استانا!» ءىىى ءداستۇرلى جەڭىلاتلەتيكالىق ەستافەتادان باستالدى. جارىسقا قاتىسۋشىلاردىڭ ءبىرىنشى توبى تاۋەلسىزدىك الاڭىنان «شاحتەر» ستاديونىنا دەيىن جۇگىرىپ وتسە, ەكىنشى توبى تۇڭعىش پرەزيدەنتتىڭ تەمىرتاۋداعى تاريحي-مادەني ورتالىعى الدىندا مارەگە جەتتى.
بۇدان كەيىن قاراعاندىنىڭ باس ساياباعىندا وتكەن ەتنومادەني بىرلەستىكتەر ونەرپازدارىنىڭ, ارداگەرلەر مەن جاستار ۇيىمدارى مۇشەلەرىنىڭ, جۇرتشىلىق وكىلدەرىنىڭ باسقوسۋى استانالىقتار شاتتىعىن بىرگە بولىسۋگە ۇلاستى.
سالتاناتتى جيىندى قالا اكىمى نۇرلان اۋباكىروۆ اشىپ, تۇرعىنداردى ورتاق ايتۋلى وقيعامەن قۇتتىقتادى. قوعامدىق ءومىر بەلسەندىلەرىنە «قازاقستان حالقى اسسامبلەياسىنا – 20 جىل» مەدالىن تابىس ەتتى. سونىمەن قاتار, استانانىڭ قۇرداستارىنا ەسكەرتكىش بەلگىلەر تاپسىرىلدى.
«استانا – اسقاق ابىرويىمنىڭ ايعاعى» باعدارلاماسى اياسىندا قالي بايجانوۆ اتىنداعى وبلىستىق كونتسەرت بىرلەستىگى, «قۋانىش» جانە «اققۋ» انسامبلدەرىنىڭ ونەرپازدارى شاشۋ شاشقان ءان مەن بي جينالۋشىلاردىڭ كوڭىل-كۇيىن ءوسىردى. ونى «اسقاقتاي بەر, ەلىمنىڭ استاناسى!» قالالىق ءان فەستيۆالى جالعاستىرىپ, بۇلدىرشىندەر وزدەرى سالعان سۋرەت كورمەسىن كورسەتىپ, سپورتتىق ويىندار سايىسى قىز-قىز قايناپ, قىزىقتى دۋمان ءسانى وسە ءتۇستى. ىمىرت ۇيىرىلگەن ساتتە وتشاشۋلار قالا اسپانىن جارقىراتىپ, مەرەكەلىك كەش كوركىن نۇرلاندىردى.
لينار گاليموۆ.
قوستاناي
ءنازيرا جارىمبەتوۆا,
«ەگەمەن قازاقستان».
كەشەگى مەرەكە استانا تۋرالى ۆيكتورينالىق سۇراق-جاۋاپ ويىندارىنان باستالدى. استانا تۋرالى سۇراق تا كوپ ەكەن, وعان قوستانايلىق جاستاردىڭ ءدال جاۋابى دا دايىن بولىپ شىقتى. استانانى قوستانايلىقتاردىڭ جاقسى كورەتىنى وسىدان-اق بەلگىلى بولىپ تۇردى. ال كوللەكتسيا جيناۋشىلاردىڭ كورمەسى قوستانايلىقتاردىڭ استانا كۇنىنە ەرەكشە تارتۋى ەدى. كۇيتاباق, جۋرنال, قۋىرشاق, كادىمگى شايدىڭ ءتۇرلەرى, فارفوردان جاسالعان كادەسىي, توسبەلگى, اقشا, ماركا تۇرلەرىن مەرەكەگە جينالعاندار وسى جەردەن كورىپ تاماشالادى.
– توسبەلگى, اقشا, تيىن اقشا, ماركالار تۇرلەرىن جيناۋمەن اينالىسامىن. استانا كۇنى وسى جيعان-تەرگەنىمدى قوستانايلىقتارعا كورسەتۋ مەن ءۇشىن قۋانىش بولىپ تۇر. توسبەلگىنىڭ 500 مىڭداي ءتۇرىن جيناعانمىن, اقشا ءتۇرلەرى دە جەتكىلىكتى. ونىڭ ىشىندە تاۋەلسىز ەلىمىزدىڭ العاشقى شىققان اقشالارى جىل وتكەن سايىن جۇرتتىڭ قىزىعۋشىلىعىن تۋدىرىپ كەلەدى, – دەيدى كوللەكتسيا جيناۋشى مارات حاسەنوۆ.
ال قولونەرمەن اينالىساتىن رايىمگۇل راحاليەۆا ءوزى تىككەن قولونەر بۇيىمدارىن قوستانايلىقتاردىڭ نازارىنا ۇسىندى. وندا بۇگىنگى جاستار بىلە بەرمەيتىن, ۇمىتىلىپ بارا جاتقان بۇيىمدار نازار اۋدارتادى.
– مىنە, مىناۋ قۇدا تارتاتىن ارقانعا جاڭا ءتۇر بەرىپ, ويۋلاپ جاساپ شىقتىم, سونداي-اق, حالقىمىز كەلىننىڭ بەتىن اشقاندا اياعىنىڭ استىنا ەشكىنىڭ تەرىسىنەن جاسالعان تۋلاق توسەگەن عوي. ونى دا مەن جاڭاشا تۇرلەندىرىپ جاسادىم, – دەيدى ر.راحاليەۆا. كورمەگە ءاربىر قاتىسۋشىنىڭ كورەرمەنگە ايتار قىزىقتى اڭگىمەسى جەتەرلىك. وعان جينالعان جۇرتتا ەسەپ جوق.
قالا ورتالىعىندا قوستانايلىقتار مەن قالا قوناقتارى وبلىس كوركەمونەرپازدارىنىڭ كونتسەرتىن تاماشالادى. اۋداندارداعى ونەرپازدار دا استانا كۇنىنە ونەرىن تارتۋ ەتتى. استانا كۇنى ناعىز حالىقتىق مەرەكەگە اينالدى, كوك زەڭگىر اسپاندا قالىقتاعان ءان اۋەنىنە ەلتىگەن قالالىقتار ورتالىق الاڭدا دوڭگەلەنە بي بيلەدى. ارقادا توتىداي تارانعان استانا بارلىق قازاقستاندىقتاردىڭ ماقتانىشى, پاتريوتتىق سەزىمنىڭ تۇما بۇلاعى ەكەنىن كورسەتىپ بەردى.
قىزىلوردا
ەرجان بايتىلەس,
«ەگەمەن قازاقستان».
«ماڭگىلىك ەلدىڭ» جۇرەگى, تۇتاس ەلدىڭ تىرەگى – استانا كۇنىن سىر جۇرتشىلىعى دا ءوز دارەجەسىندە اتاپ ءوتتى. ەلوردانىڭ تۋعان كۇنىن تويلاۋدا ەڭبەكتەگەن بالالاردان باستاپ ەڭكەيگەن ەگدەلەرگە دەيىن اتسالىستى دەسەك بولاتىنداي. سەبەبى, قىزىلوردالىق بالالار «مەنىڭ استانام» تاقىرىبىندا اسفالتتا سۋرەت سالۋ بايقاۋىنا قاتىستى. بالالار «بايتەرەك», «حان شاتىر» سەكىلدى استانانىڭ كورىكتى جەرلەرىن كوركەمدەپ, سۋرەتكە سالدى. ەركىندىك پەن ەلدىكتىڭ سيمۆولىنداي بولعان ەلوردانىڭ كەلبەتى جاس جەتكىنشەكتەردىڭ بەينەلەۋىندە ەرەكشە شىقتى.
ونان سوڭ ءابدىلدا تاجىباەۆ اتىنداعى وبلىستىق امبەباپ كىتاپحانادا «ەلىمنىڭ جۇرەگى – استانا» اتتى كىتاپ كورمەسى ءوتتى.
وندا استانانىڭ ارعى-بەرگى تاريحىنان سىر شەرتەتىن دەرەكتەر قويىلىپ, ەلىمىزدىڭ باس قالاسى تۋرالى جازىلعان شىعارمالار وقىرمان نازارىنا ۇسىنىلدى.
وبلىستىق تاريحي-ولكەتانۋ مۋزەيى دە استانا كۇنىنە قىزۋ دايىندالدى. «ءتاۋەلسىز قازاقستان» زالىن اسەم كوركەمدەپ, «استانا – اسەم قالا» اتتى تاقىرىپتىق ەكسكۋرسيالار جاسادى. وندا استانانىڭ قالاي سوعىلعانى, بۇگىندە قانداي جەتىستىكتەرگە جەتكەنى ايتىلدى. مۋزەيگە كەلۋشىلەر استانا ءومىرىنىڭ ءوزدەرىنە بەيمالىم تۇستارىن ءبىلىپ قايتتى.
ال شيەلى اۋدانى بيىلعى وقۋ جىلىن ۇزدىك اياقتاعان بالالارىن ارنايى استاناعا اتتاندىردى. مەرەكە بارىسىندا ولار ەلوردانى ءوز كوزدەرىمەن كورىپ, ارالاپ قايتپاق.
استانا كۇنىنە ارنالعان شارالاردىڭ سوڭىن «اق تىلەكپەن – استاناعا» اتتى جاستاردىڭ فلەش-موب اكتسياسى مەن «ەل جۇرەگى – استانا» مەرەكەلىك كونتسەرتى تۇيىندەدى.
ورال
تەمىر قۇسايىن,
«ەگەمەن قازاقستان».
ورال وڭىرىندە استانا كۇنىنە تارتۋ رەتىندە الەۋمەتتىك-تۇرمىستىق نىساندار, كوپقاباتتى تۇرعىن ۇيلەر مەن دەنەشىنىقتىرۋ-ساۋىقتىرۋ كەشەندەرى جانە بوبەكجايلار پايدالانۋعا بەرىلدى.وسىناۋ ءسانى مەن سالتاناتى كەلىسكەن كەشەندەر وبلىس ورتالىعى جانە وعان تاياۋ ورنالاسقان ەلدى مەكەندەر مەن شالعايداعى سىرىم, قاراتوبە جانە جانىبەك اۋداندارىنىڭ تۇرعىندارىن ۇلكەن قۋانىشقا بولەدى. سونىمەن بىرگە, استانا كۇنى قارساڭىندا وبلىس اۋداندارىندا «ديپلوممەن – اۋىلعا!» باعدارلاماسىنا ساي جاس ماماندارعا جاڭا پاتەرلەردىڭ كىلتى تاپسىرىلدى.
– مۇنىڭ ءبارى تاريحى تەرەڭ, ءداستۇرى مول اقجايىق ايماعىنىڭ استاناعا قاراپ بوي تۇزەي العاندىعىنىڭ باستى كورىنىسى, – دەدى باتىس قازاقستان وبلىسىنىڭ اكىمى نۇرلان نوعاەۆ. – استانا ەل وڭىرلەرىنىڭ وركەندەۋىنە دە قوزعاۋ سالىپ وتىر. بۇگىندە باس قالا ءاربىر قازاقستاندىقتىڭ ماقتان تۇتار برەندىنە اينالدى. ونىڭ بولاشاعى بۇگىنگىسىنەن دە جارقىن. ويتكەنى, ەلوردانىڭ ىشكى دامۋ جۇيەسى مەن ينفراقۇرىلىم ءورىسى قۋاتتى.
ال ورال قالالىق ءماسليحاتىنىڭ دەپۋتاتى, كاسىپكەر ليانا تۇرسىنوۆا ءوز وي-پىكىرىن بىلايشا ساباقتادى. «مەن الەمگە ايگىلى قالا – نيۋ-يوركتە بولعانىم بار. ارينە, ول – ساۋلەتى دە داۋلەتى كەلىسكەن شىرايلى شاھار. ايتسەدە, ونىڭ ودان ءارى ىرگەسىن كەڭەيتەتىن ءبىر تۇتام جەرى جوق ەكەنىنە كۋا بولدىم. الەم قالالارى اراسىندا مۇنداي مىسالدار از ەمەس. وسى تۇرعىدا ەلوردامىزدىڭ كۇن سايىن قاناتىن كەڭگە جايىپ, ءوسىپ-وركەندەپ كەلە جاتقانىنا قۋانامىز».
– وبلىستا استانا كۇنىنە ارنالعان ءىس-شارالار كەشەنى اياسىندا فەستيۆالدار مەن دوڭگەلەك ۇستەلدەر, حالىقارالىق تۋرنيرلەر مەن جارمەڭكەلەر جانە مەرەكەلىك كونتسەرتتەر وتكىزىلدى. ونىڭ ىشىندە باتىس قازاقستان وبلىستىق تاريحي-ولكەتانۋ مۋزەيىندە اشىلعان «ەلباسى جانە تاۋەلسىزدىك زالى» تۇساۋكەسەرىنىڭ شوقتىعى بيىك. بۇگىندە ەۋرازيا كەڭىستىگىنىڭ قاق ورتاسىنان ورىن تەپكەن استانا قايتالانباس كەلبەتىمەن بارشا الەم جۇرتشىلىعىن تامساندىرۋدا. ونىڭ باس ساۋلەتشىسى – ەلباسى نۇرسۇلتان نازارباەۆ. ونىڭ ەسىمىمەن قاتار تۇراتىن تاعى ءبىر باعا جەتپەس تاريحي قۇندىلىق بار, ول – تاۋەلسىزدىك. «ەلباسى جانە تاۋەلسىزدىك» زالى جاساقتالۋىنىڭ ءتۇپ – توركىنىندە وسىنداي ءمان-ماعىنا بار, – دەدى وڭىردەگى ارحيۆ ءىسىنىڭ مايتالمانى ۆياچەسلاۆ ينوچكين.
مۇندا مەملەكەت باسشىسىنىڭ ءومىرى مەن قىزمەتىنە قاتىستى قۇندى قاعازدار جانە جادىگەرلەر مەن فوتوسۋرەتتەر قويىلعان. ونىڭ ءبارى ون ەكى اينەك سورەگە جيناقى تۇردە جۇيەلەنگەن.
وبلىستا استانا كۇنىنە ارنالعان ءىس-شارالار شوعىرى قادىر مىرزا ءالى اتىنداعى مادەنيەت جانە ونەر ورتالىعىنىڭ امفيتەاترىندا وتكىزىلگەن «اسقاقتاي بەر, استانا!» اتتى مەرەكەلىك كونتسەرتپەن قورىتىندىلاندى.
وسكەمەن
دۋمان اناش,
«ەگەمەن قازاقستان».
شىعىس جۇرتشىلىعى ەلوردا كۇنىن ەرەكشە كوڭىل كۇيمەن اتاپ ءوتتى. ءوڭىردىڭ بارلىق قالالارى مەن اۋداندارىندا استانا كۇنىنە وراي ءتۇرلى ءىس-شارالار ۇيىمداستىرىلدى. وبلىس ورتالىعىنداعى شارالار تاڭسارىدەن باستالدى. وسكەمەندىكتەر مەن قالا قوناقتارى بۇل مەرەكەنى سپورتتىق سايىستارمەن قارسى الدى. ۆەلومارافونمەن باستالعان مەرەكەگە تابيعاتتىڭ تارتۋى – جاڭبىر دا قولايلى جاعداي جاسادى. ۆەلوشەرۋگە قاتىسۋعا بارلىق جاستاعى تۇرعىندار مۇمكىندىك الدى. ەرتىس وزەنىنىڭ جاعالاۋىندا سپورتتىق ءجۇرىستەن جانە جۇگىرۋدەن رەسپۋبليكالىق جارىس, دەنەشىنىقتىرۋ-ساۋىقتىرۋ كەشەنىندە قازاقشا كۇرەستەن تۋرنير ءوتتى.
سونداي-اق, استانا كوشەسىندە «استانا – ەۋرازيا جۇرەگى!» اتتى مەرەكەلىك كونتسەرت ءوتتى. وبلىس اكىمىنىڭ ورىنباسارى جاقسىلىق ومار, وسكەمەن قالاسىنىڭ اكىمى تەمىربەك قاسىمجانوۆ ءوڭىر جۇرتشىلىعىن ەلوردا كۇنىمەن قۇتتىقتادى. اتالعان شارادا وبلىستىق دوستىق ءۇيى – قوعامدىق كەلىسىم ورتالىعىنىڭ شىعارماشىلىق ۇجىمدارى ءوز ونەرلەرىن پاش ەتتى. بالالارعا ارنالعان سپورتتىق ويىندار مەن جارىستار ۇيىمداستىرىلىپ, وسكەمەندىكتەر وقۋشىلاردىڭ شىعارماشىلىق ءۇيى, شەبەرلەر قالاشىعى جانە كىتاپحانالار كورمەسىن تاماشالادى. مەرەكەلىك ساۋدا-ساتتىق پەن اكۆاگريم, شاحمات, دويبى, ارمرەستلينگ تە تۇرعىنداردىڭ كوڭىلىن كوتەردى.
ەڭ قىزىعى, مەرەكە بارىسىندا قىزداردىڭ قاتىسۋىمەن وتكەن «موتو-لەدي» اتتى بايك-شوۋ بولدى. بۇل باسەكەدە موتوتسيكل مىنگەن قىزدار ءتۇرلى سىناقتاردا ءوز ونەرلەرىن كورسەتتى. سونىمەن بىرگە, وبلىس ورتالىعىنىڭ ساياباقتارىندا دا مەرەكەلىك شارالار ۇيىمداستىرىلىپ, كومسومول ارالىندا وسكەمەن قالاسىنىڭ اۋەسقوي فۋتبول كوماندالارى اراسىندا شاعىن فۋتبولدان جارىس ءوتتى.
سۋرەتتى تۇسىرگەن
سەرگەي سۋروۆ.
پاۆلودار
فاريدا بىقاي,
«ەگەمەن قازاقستان».
وبلىس ورتالىعىنداعى مەرەكە «سارىارقا ءتورى – استانا» دەگەن ادەبي-سازدى ەرەكشە كومپوزيتسيالىق كورىنىستەرمەن باستالدى. ساتباەۆ اتىنداعى ورتالىق كوشە بويىندا ورنالاسقان ۇلكەن ەكران «استاناعا – 17 جىل» اتتى بەينەروليك كورسەتىپ تۇردى. ورتالىق الاڭعا جينالعان جۇرتشىلىقتى ەرتىس وزەنىنىڭ جوعارى جانە تومەنگى جاعالاۋى دەپ بولىنەتىن ارنايى مەرەكەلىك شارالار باعدارلاماسى قارسى الدى. بۇرىنعىداي ەمەس, زامانعا ساي قازىر نەشە ءتۇرلى ەرەكشە باعدارلامالار قوسىلعانىن كورەسىڭ.
ءبىزدىڭ وبلىس ورتالىعى دا استاناعا قاراپ بوي تۇزەۋدە. كەشەگى سوققان جەل دە, جاۋعان جاڭبىر دا ساپ تىيىلعان. جوعارعى جاعالاۋدا كوپشىلىكتى «اسقاقتاعان استانا» قالالىق فەستيۆالى مەن قازاقستان حالقى اسسامبلەياسىنىڭ ەتنومادەني بىرلەستىكتەرى شىعارماشىلىق ۇجىمدارىنىڭ كونتسەرتى شاقىرۋدا. سونداي-اق, «استانام – ماقتانىشىم» دەپ يسا بايزاقوۆ اتىنداعى وبلىستىق فيلارمونيانىڭ انشىلەرى ونەر كورسەتۋدە. جاستار «استاناعا اق تىلەك» تىلەكتەرى جازىلعان ءتۇرلى-ءتۇستى شارلارىن اۋەگە ۇشىرۋدا.
وسى جەردە «ريتمى گورودسكيح كۆارتالوۆ» حيپ-حوپ, برەيك, رەپ توپتارىنىڭ, سكەيتەرلەر, روللەرلەر, تولكينيستەر توپتارىنىڭ قاتىسۋىمەن جاستاردىڭ شىعارماشىلىق باعدارلاماسى, جاستاردىڭ ۇلتتىق دەلفي ويىندارى جەڭىمپازدارىنىڭ كونتسەرتى بولدى. ءتىپتى, «ءوزىڭدى ءوزىڭ سىناپ كور» دەپ اەروموبيلدى اسكەرلەرىنىڭ «دەسانتنوە براتستۆو» اسكەري-سپورتتىق جارىستارىن, «لازەرتاگ» اتىس بويىنشا ويىنىن, ستريتبول ويىنىن, جاعاجاي فۋتبولى مەن جاعاجاي ۆولەيبولى بويىنشا ەرىكتىلەردىڭ اراسىندا وتكەن مەرەكەلىك تۋرنيرلەردى كورىپ, قىزىعا قارايسىڭ.
ەكىنشى ءبىر شەتتە «استاناما ارنالعان تاڭعاجايىپ بوياۋلار» الەمى مەگا-بوياماسى كوز جاۋىن الادى. ال تومەنگى جاعالاۋ بولسا, كىشكەنتاي بالالارعا تولى. مۇندا «كورىكتى قالا – استانا!», «كولوس» بالالار مادەني ويىن-ساۋىق ورتالىعى مەن قالالىق ءبىلىم بەرۋ ءبولىمىنىڭ بالالار شىعارماشىلىعىن دامىتۋ ورتالىعىنىڭ كونتسەرتتىك-ويىن باعدارلاماسى وتۋدە. «ۇلكەن اتتراكتسيون» الاڭىندا كوڭىلدى بالالارمەن «بي بيلەپ», بويشاڭ قۋىرشاقتار دا ءجۇر. «اكۆا-گريم» بالالار الاڭشاسىندا «تولاعاي» بالالارعا ارنالعان وتباسىلىق ويىن باعدارلاماسىنا قاتىسۋشىلار دا كوپ ەكەن.
«قالا كىتاپحانالارى شاقىرادى» اتتى قالا كىتاپحانالارىنىڭ تانىمدىق-سازدى باعدارلاماسى نەگىزىندە كىتاپتار كورمەسى, «گۇل جايناعان استانا» – جاس سۋرەتشىلەردىڭ كورمەسى, فوتوكورمە, «استاناعا تارتۋ» اتتى قولدانبالى-ساندىك ونەر شەبەرلەرىنىڭ كورمەسى ۇيىمداستىرىلدى. سونىمەن بىرگە, تاتتىلەر, كوكونىستەر, توقاشتار, ۇلتتىق تاعامدارعا ارنالعان مەرەكەلىك ساۋدا دا قىزۋ ءجۇردى. مەرەكە سوڭى «ماڭگىلىك ەل» اتتى وبلىس ورتالىعىنداعى «شاڭىراق» ويىن-ساۋىق ورتالىعى, قۋات ابۋسەيىتوۆ, ەستاي اقىن اتىنداعى مادەنيەت سارايلارى ۇجىمدارىنىڭ كونتسەرتتىك باعدارلاماسىنا ۇلاستى.
پەتروپاۆل
ءومىر ەسقالي,
«ەگەمەن قازاقستان».
سولتۇستىكقازاقستاندىقتار دا قىسقا مەرزىم ىشىندە زاماناۋي ءىرى مەگاپوليس قاتارىنا قوسىلىپ, ارحيتەكتۋرالىق ساۋلەتى مەن سىمباتى كەلىسكەن ەلوردانى ەلىمىزدىڭ جۇرەگى, تاۋەلسىزدىگىمىزدىڭ تىرەگى سانايدى. وڭىردە جوعارى كوتەرىڭكى كوڭىل كۇيمەن جىلدا اتاپ وتىلەتىن استانا كۇنىن اسىعا توسادى. بيىلعى مەرەكەنى وتكىزۋ جونىندەگى ءىس-شارالار جوسپارى مازمۇندىلىعىمەن ەرەكشەلەندى. ورتالىق الاڭعا جينالعان جۇرتشىلىق قاراسى مول بولدى. وبلىس اكىمىنىڭ ءبىرىنشى ورىنباسارى ايداربەك ساپاروۆ جۇرتشىلىقتى ابىروي-بەدەلىمىزدىڭ, بەرەكە-بىرلىگىمىزدىڭ, جاسامپازدىقتىڭ جارقىن كورىنىسى سانالاتىن استانانىڭ تۋعان كۇنىمەن قۇتتىقتاپ, سارىارقانىڭ قاق تورىنە قازاقستاندىقتاردى ورتاق ىسكە جىگەرلەندىرەتىن, العا قاراي تىنىمسىز ۇمتىلدىراتىن ەلباسى ساياساتىنىڭ ارقاسىندا ورنىققانىن اتاپ ءوتتى.
بۇدان كەيىن جالپى سالتانات جالپىحالىقتىق توي-دۋمانعا ۇلاستى. ول «ەل جۇرەگى – استانا» اتتى تەاترلاندىرىلعان ميۋزيكلمەن باستالىپ, مەرەكەلىك حەند-مەيككە جالعاستى. قالالىق مادەنيەت جانە دەمالىس ساياباعىندا سازدى بي جانە كوركەم شىعارماشىلىق بويىنشا «تالانتتار قالاسى» كوڭىل كوتەرۋ باعدارلاماسى نازارعا ۇسىنىلسا, اباي مەن پۋشكين ەسكەرتكىشى جانىندا فيتنەس-كلۋب, پەينبول ويناۋ, گيمناسشىلاردىڭ, اكروباتتاردىڭ, شىعىس جەكپە-جەگىنىڭ ونەرى تاماشالاندى. «استانا – ارمان قالا» ارت-بۋلۆارىن, سۋرەتشىلەر كورمەسىن, اقىندار سايىسىن قىزىقتاۋشىلار جىلى اسەرگە بولەندى.
تاۋەلسىزدىك ستەللاسى قاسىندا وتكەن ستريت-بي فەستيۆالىن, «تۋعان كۇنىڭمەن, استانا!» بالالاردىڭ كونتسەرتتىك باعدارلاماسىن, «استانا تورىندەگى التىن ۇيا» فوتوديزاين كورمەسىن كورۋشىلەر قاتارى قالىڭ بولدى. پەستروە كولىنىڭ جاعالاۋىندا ساياجاي ۆولەيبولىنان, شاعىن فۋتبولدان, تاي بوكسىنان رەسپۋبليكالىق تۋرنيرلەر, «مەنىڭ جەڭىسىم ساعان, استانا!» ۆەلوجارىسى ۇيىمداستىرىلدى. مادەنيەت وشاقتارىندا «الەمدى تاڭعالدىرعان قالا» ادەبي-پوەزيا ساعاتتارى, تاقىرىپتىق كەشتەر, ۆيكتورينالار, تاريحي-ولكەتانۋ مۇراجايىندا «استانا – ءبىزدىڭ ماقتانىشىمىز» فوتوكورمەسى, ساۋىقتىرۋ لاگەرلەرىندە سۋرەتتەر كونكۋرسى وتكىزىلدى.
بىرنەشە كۇنگە جالعاسقان مەرەكە كۇندەرى «بەرەكە» شاعىن اۋدانىندا حيميالىق-بيولوگيالىق باعىتتاعى 740 ورىندى نازارباەۆ زياتكەرلىك مەكتەبى, يندۋستريالاندىرۋ كارتاسى اياسىندا قىش كىرپىش شىعاراتىن زاۋىت, اسفالتبەتون قوسپاسى كاسىپورنى اشىلدى. «قازتەحماش» جشس ينۆەستيتسيالىق قۇنى 1,9 ميلليارد تەڭگە بولاتىن وزىق جوبانى ىسكە قوستى.
استانا كۇنى اۋدانداردا دا كەڭىنەن اتاپ ءوتىلدى.
سۋرەتتى تۇسىرگەن
امانگەلدى بەكمۇراتوۆ.
تالدىقورعان
نۇربول الدىباەۆ,
«ەگەمەن قازاقستان».
جەتىسۋ جەرىندە دە استانا كۇنى جالپىحالىقتىق مەرەكە رەتىندە اتالىپ ءوتتى. تالدىقورعانداعى ورتالىق الاڭعا جيىلعان جۇرت بۇلدىرشىندەردىڭ مىڭ بۇرالا ءارى ءار قيمىلىنا ەرەكشە ءمان بەرە جانە مەرەكەلىك لەپ ەستىرە ورىنداعان بيىنە ءتانتى بولماسقا اددىلەرى قالمادى. ويتكەنى, بۇل – ونەر.
ءدۇيىم جۇرتتىڭ الدىنا شىققان تالدىقورعان قالاسىنىڭ اكىمى ەرمەك الپىسوۆ: «ەلىمىزدىڭ ورداسى استانا قالاسى ەلباسىنىڭ ەسىمىمەن بىرگە ايتىلاتىن, اجىراعىسىز ەگىز ۇعىم ىسپەتتى. كۇننەن-كۇنگە كوركەيىپ, ءسانى مەن سالتاناتى اسىپ كەلە جاتقان استانا رەسپۋبليكامىزداعى وزگە قالالارعا ۇلگى بولۋدا. قۇرىلىس, ونىڭ ىشىندە تۇرعىن ءۇي قۇرىلىسى تەز دامىپ, زامان تالابىنا ساي باسپانالار بوي كوتەرىپ, حالىقتىڭ پايدالانۋىنا بەرىلۋدە. سونىڭ ناقتى ءبىر دالەلى رەتىندە سوڭعى ەكى-ءۇش جىلدا تالدىقورعاندا ساپ تۇزەگەن بىرنەشە شاعىن اۋداندى ايتۋعا تۇرادى. ەكشەي بىلسەك, بۇل ەلباسىنىڭ ەرەن ەڭبەگىنىڭ ءبىر جەمىسى», – دەدى.
تاعى ءبىر ەرەكشە ايتار قۋانىش – ءدال وسى كۇنى كامەلەتتىك جاسقا تولعان تالدىقورعاندىقتارعا جەكە كۋالىكتەرىن سالتاناتتى تۇردە تاپسىرۋ ءراسىمى ءوتتى.
ارينە, قالانىڭ كوركەيۋىنە وزىندىك ۇلەسىن قوسا بىلگەن قۇرىلىسشىلار دا نازاردان تىس قالماي, قالا اكىمىنىڭ قۇرمەت گراموتاسىمەن ماراپاتتالدى. مەرەكەلىك شارا كونتسەرتتىك باعدارلامامەن جالعاستى.
تاراز
ورالحان ءداۋىت,
«ەگەمەن قازاقستان».
ەلوردامىز – استانا قالاسىنىڭ مەرەيتويىن اتاپ ءوتۋدى جامبىلدىقتار اپتا بۇرىن باستاپ كەتكەن بولاتىن. كەشەگى اپتادا وبلىس ورتالىعىندا داستاندار مەن قيسسالاردى جاتقا ايتۋدان وتكەن «داۋىلپاز جىرى دالانىڭ» اتتى وبلىستىق بايقاۋ وسىناۋ مەرەكەنىڭ اۋليەاتا جەرىندەگى تۇساۋىن كەستى. ودان كەيىن اپتا بويى تاراز تورىندە «قارىشتاعان قازاقستان – اسقاقتاعان استانا» اتتى جىلجىمالى كورمە, «مەنىڭ قازاقستانىم – مەنىڭ استانام» اتتى ينتەللەكتۋالدى-تانىمدىق ويىن, «ارايلى استانام – باس قالام!» اتتى قايىرىمدىلىق كونتسەرتتىك باعدارلاماسى, «استانا – جاستار ماقتانىشى!» اتتى جاستار فلەش-موبى جانە باسقا دا ءىس-شارالار مەرەكەنىڭ اجارىن اشىپ, ماڭىزىن ارتتىرا ءتۇستى.
ال 6 شىلدە كۇنى جامبىل جۇرتى «جايناي بەر, مەنىڭ استانام!» اتتى جاستار سپارتاكياداسىن تاماشالادى. «ەل بىرلىگى – ەڭ اسىل قاسيەت» دەپ ەلباسىمىز ايتقانداي, قاسيەتتى اۋليەاتا ءوڭىرى – ەجەلدەن دوستىقتىڭ كيەلى مەكەنى. جامبىل جەرىندە باستالعان سالتاناتتى مەرەكەنى ءارتۇرلى ۇلت وكىلدەرى دە بەرەكە, بىرلىگىمەن قارسى الدى. بۇل كۇنى وبلىستىق قازاقستان حالقى اسسامبلەياسى «تۋعان كۇنىڭمەن, استانا» اتتى اكتسياسىن ۇيىمداستىرىپ, كوك اسپانعا مەرەكەلىك شارلار جىبەرۋ جانە بۇلدىرشىندەرگە شار سىيلاۋ راسىمدەرىن وتكىزدى. ال كەشكە قازاقستان رەسپۋبليكاسىنىڭ تۇڭعىش پرەزيدەنتى ساياباعىندا وتكەن «تارازدان استاناعا تارتۋ» مەرەكەلىك ءىس-شاراسى تارازدىقتارعا كوتەرىڭكى كوڭىل كۇي سىيلادى.
سۋرەتتى تۇسىرگەن
التىنبەك قارتاباي.
شىمكەنت
باقتيار تايجان,
«ەگەمەن قازاقستان».
استانا – جاسامپازدىقتىڭ, ماڭگى دوستىقتىڭ قالاسى, قيىن كەزەڭدە قازاقتىڭ بولاشاق تاعدىرىن شەشكەن دە قالا. ولاي دەيتىنىمىز, وتكەن عاسىردىڭ 90-شى جىلدارىندا جەر استىنان جىك شىعارعان, كەيبىرەۋلەر سولتۇستىك وبلىستارداعى اعايىننىڭ تاتۋلىعىنا قول سۇقپاق بولعان, قازاق جەرىنە كوز الارتقان.
ەلباسى ەل استاناسىن الاتاۋدىڭ باۋرايىنان سارىارقانىڭ توسىنە كوشىرىپ اكەلگەندە ۇلكەن قاتەلىك دەپ قابىلداعان جۇرت بۇگىندە قانداي دانالىق دەپ تاڭدانادى.
سويتكەن استانا كۇنىنە وڭتۇستىك ۇلكەن تارتۋ جاساعان. اينالدىرعان ەكى-ءۇش كۇندە 75 جاڭا نىساننىڭ تۇساۋىن كەستى. شولىركەپ وتىرعان اۋىلدارعا سۋ باردى, مىڭداعان وتباسى كوگىلدىر وتىن جاعىپ, ىس باسقان پەشتەن قۇتىلادى. الەۋمەتتىك نىساندار ايقارا ەسىك اشتى. استاناعا وسىلاي تارتۋ جاساعان وڭتۇستىكقازاقستاندىقتار 6 شىلدە كۇنىن دە لايىقتى مەرەكەلەدى.
ارقاداعى اعايىن كۇن ىستىعى 40 گرادۋستان اسىپ, قارا قارعانىڭ ميىن اتالا قىلعان اپتاپتى وڭتۇستىكتە مۇز دەگەن بولمايدى دەپ ويلايتىن شىعار. ولاي ەمەس, استانا كۇنىنە «مەگاشىمكەنت» ورتالىعىندا مۇزدا مانەرلەپ سىرعاناۋدان قىزىقتى جارىس ءوتتى.
اباي ساياباعىندا تەننيس كورتىندا جارىس بولسا, شىمكەنت زووباعى بالالارعا اشىق ەسىك كۇنىن ۇيىمداستىردى. «يمران» ساۋدا ءۇيىنىڭ سپورت الاڭشاسىندا باسكەتبولدان جارىس وتسە, اباي, جەڭىس ساياباقتارى مەن سەيدوللا بايتەرەكوۆ اتىنداعى اللەيادا كوپشىلىك سەرۋەن, سپورتتىق ويىندار ءوتتى.
مەرەكەلىك شەرۋ كەشكى ساعات 20-دا جاڭا اكىمشىلىك-ىسكەرلىك ورتالىق الاڭىندا ونەر جۇلدىزدارىنىڭ قاتىسۋىمەن وتكەن «جان جۇرەگىم – استانا» گالا-كونتسەرتىنە ۇلاستى. اۋدان, قالا ورتالىقتارى دا وسىلايشا مەرەكەلەدى.
بۇكىل قازاقستاندىقتاردىڭ ورتاق قۋانىشىنا اينالعان استانا كۇنى ۇلىستىڭ ۇيىتقىسى اتانعان وڭتۇستىكتە وسىلايشا تويلاندى.
